Israelo emisias unuafoje posxtmarkon "Esperanto-Zamenhof"
---------------------------------------------------------

Kun granda gxojo mi informas vin kaj cxiujn esperantistojn kaj amikojn de
Esperanto, ke post kelkjardekaj klopodoj Esperanto-Ligo en Israelo sukcesis
atingi la jenan celon: "Apero de la unua oficiala Esperanta-Zamenhofa
posxtmarko en Israelo".

La emisio okazos la 17-an de decembro en 2006.
Sur la pm aperas portreto de L. L. Zamenhof dezajnita en Esperanto-teksto.
Samtage gxi estos stampata per unuataga porokaza stampo (interalie sur UTK),
kaj iom poste aperos ankaux memorfolio, kiu surhavos la samajn posxtmarkon
kaj stampon.

Menciindas, ke la Israela Filatela Servo akceptis la peton aperigi
posxtmarkon okaze de la 120-a datreveno de la naskigxo de Esperanto kaj
la 90-a datreveno de la forpaso de Zamenhof precipe danke al klopodoj de
la israela esperantistino Malka Zemeli.

Pri la rilatoj kun la emisianta instanco respondecas Jehosxua Tilleman,
cxefdelegito de UEA en Israelo, kiu okupigxadis kune kun Malka Zemeli
pri cxiuj teknikaj detaloj kaj dauxre okupigxos pri la disvendado de la
posxtmarkoj kaj la kromproduktoj inter la esperantistoj.