IV.


Kiam proksimighe la vesperon la medicina konsilanto Lange venis al
sia pacientino, li shin trovis multe pli bonfarta, ol li estis
atendinta. Li sidighis al shia lito kaj interparolis kun shi pri tiu
fatala okazajho. Shi estis apoginta sian brakon sur la kusenojn, en
la gracia mano kushis shia bela kapo. Shia vizagho ankorau estis tre
pala, sed ech la konsumiteco de shiaj fortoj shajnis doni al shi
siaspecan allogecon. Shia malhelaj okuloj neniom perdis de tiu ardo,
tiu esprimopleneco, kiu jam pli antaue de sur la scenejo allogis la
kuraciston, kvankam li estis kviete jughanta viro kaj ne plu havis la
aghon, kiam fantazio helpas al la belo. Li devis konfesi al si, ke li
malofte vidis kapon tiel belan, vizaghon tiel charman; shiaj trajtoj
neniel estis regulaj, kaj tamen per siaj kuneco kaj harmonio kauzis
ensorchon, por kiu li longe ne sciis kialon. Sed al la psikologia
sagaco de la medicina konsilanto tiu kialo ne restis kashita; ghi
estis tiu puro de l'animo, tiu nobleco de l'naturo, kio per surpriza
brilo de beleco survershis tiujn virgulinajn trajtojn. "Shajnas,
ke vi studas miajn trajtojn, doktoro", la kantistino ridetante diris,
"vi sidadas tiel silente kaj meditante, streche rigardas min kaj
shajne tute forgesas, pri kio mi demandis. Au chu tio estas tro
terura, por ghin sciigi al mi? Chu mi ne povas audi, kion la urbo
diras pri mia akcidento?"

"Por kio vi volas audi chiujn stultajn supozojn, kiujn elpensas kaj
disvastigas neokupitaj homoj? Mi jhus meditis pri tio, kiel pura via
animo sin spegulas sur viaj trajtoj; vi havas pacon en vi, kiom vin
zorgigas la jugho de la aliaj homoj?"

"Vi evitas mian demandon", shi respondis, "vi volas elturnighi,
dirante al mi belajn aferojn. Kaj mi ne zorgu pri la jugho de
l'homoj? Kiu honesta junulino povas tiel ignori la societon, en kiu
shi vivadas, ke estas al shi indiferente, kion oni parolas pri shi?
Au chu vi eble opinias, ke mi neniel konsideras tion, char mi estas
anino de klaso, pri kiu oni ne havas bonan opinion? Konfesu malkashe,
vi opinias min tre facilanima."

"Ne, certe ne; mi chiam nur belajhojn audis pri vi, fraulino
Bianetti, pri via trankvila, izolita vivado, kaj ke vi staras en la
mondo kun firma tenigho, kvankam vi estas tiel soleca kaj elmetita al
multaj intrigoj. Sed kial vi volas ghuste scii, kion diras la homoj?
Kaj se mi kiel kuracisto tiajn novajhojn ne konsiderus konvenaj?"

 

 

 

 

 

 

 

多谢老师！