Hannes van Loggerenberg (Nederlando)

Kondiĉoj

(libere laŭ formo "sopir' al sudo")

Hodiaŭ:
alpagiĝinte
brilus ruĝe ĉielo,
plorus nur ridetante
ni laŭkomande.

Hieraŭ:
pulsus senĉese
gutoj de plumbopluvo,
batus horoj plenpeze
eĉ senpermese.

(Kaj morgaŭ?
Ĉi tuta afer'
forgesus kaj lasus nin
malantaŭ si aŭ preter
fuĝinta esper'.)

Bonvenon

—laŭ ĉineska skemo Sopir-al-sudo

Bonvenon

jen al vi Hannes!

Vi per ĉinstila poem’

debutas kun sukces’.

Mi aprecas, jes!

Ha, brave!

Amiko Hannes

el fora Nederlando

daŭrigu verki sen ĉes’!

Certe kun sukces’.

Hannes van Loggerenberg (Nederlando)

Marso super Khanbaliko

(libere laŭ formo "sopir' al sudo")

Pensas mi,
enrigardanta,
ke estas la ĉielo
flakon pliruĝiganta,
flago ridanta

spegule,
sub la piedo
de tiu kiu farbas
la straton en maniero
de sangolitero

per akvo
de vivo tro-tro
frufinigita tie
kie trompas nin astro
de ĉi malvintro.