KIO ESTAS LA SIGNIFO DE LA VIVO

       Mi legis rakonteton, kiu multe meditigis min:

“Iam vivis reĝo, kiu, malgraŭ sia multeokupiteco je la regado, ĉiam cerbumadis pri la signifo de la vivo, sed vane. Li ordonis, ke ĉiuj filozofoj en la regno faru esploradon pri tiu ĉi temo kaj prezentu al li la konkludon, al kiu ili venos.

“La konkludo estis volumo tro kolosa, por ke la reĝo, tiam jam morte malsana, povu ĝin tralegi. Kio do estas la signifo de la vivo? Li ordonis en sia mortolito, ke la plej eminenta el la filozofoj respondu al li per unu frazo. La filozofo diris mallaŭte en la orelon de la reĝo: ‘La vivo estas nenio alia, ol la jeno: Unu animo venas en la mondon por sperti suferojn kaj poste mortas. Sed ĝuste dank’ al la penado de tiu persono ĉiuj homoj en la mondo ne estos plu turmentataj de la samaj suferoj, kiujn li travivis.’ Aŭdinte la vortojn, la reĝo mortis kun kontenteco.”

Mi deziras nur, ke miaj du vortaroj, en kiujn mi metis miajn preskaŭ ĉiujn sciojn kaj spertojn akumilitajn dum mia plurjardeka palpado en la malfacilaj cirkonstancoj, povu helpi al la aliaj esperantistoj kaj la estontaj E-lernantoj pli facile, pli rapide kaj pli bone posedi nian karan lingvon, ol mi. Jen la signifo de la vivo, al kiu mi strebas.